Кеше компанияға қарасты ірі басқармалардың бірі «Жылыоймұнайгаз» мұнай-газ өндіру басқармасында ардагерлерді құрметтеген игі шара өтті.
Жылойлық мұнайшылар түрлі деңгейдегі шараларға сала ардагерлерін шақыруды тұрақты түрде ұйымдастырып келеді. Мәселен, Наурыз мерекесіне 150 ардагерді арнайы шақырып, жыл басы – Ұлыстың Ұлы күнін бірге тойласа, таяуда осынау жарасымды дәстүр тағы да жалғасын тапты.
«Жылыоймұнайгаз» мұнай-газ өндіру басқармасының ұжымы ұйымдастырған ауызашар дастарханына 150 ардагер қатысты. Қасиетті айдағы қауышуда ардагерлер басқарма басшысы Ғибатолла Шанаев бастаған үлкен ұжымға ақ батасын беріп, ізгі тілектерін жолдады.
Аға буынды ұлығылау, олардың еңбегін бағалау мақсатындағы іс-шаралар жылыойлық мұнайшылар тарапынан тұрақты түрде жалғаса бермек.
Айта кету керек, аталмыш басқармада 700-ден астам ардагер мұнайшы бар.