Сәуірдің алғашқы жексенбісінде геологтардың кәсіби мерекесі аталып өтеді. Бозашы түбегінің қойнауына жасырынған қара алтынды өндіруде елеулі үлесі бар «Қаражанбасмұнай» АҚ Геология және игеру департаментінің мамандары кен орнын алғашқы ашушылардың игі дәстүрлерін абыроймен жалғастырып келеді.
Кен орнында және орталық кеңседе жұмыс істейтін геологтардың берік әріптестік қарым-қатынасы арқасында былтыр компанияда ауқымды істер атқарылды. Нақтырақ айтсақ, ҚР Мемлекеттік қорлар комитеті отырысында «Қаражанбас кен орны мұнай қорларының өсуі» есебі қабылданып, геологиялық қор мен алынатын қорлар көлемі ұлғайды. Ұңғымаларды тұз қышқылымен өңдеу әдісімен жасалған жұмыстар оң нәтиже берді.
Ал биыл кен орнының жағалау бөлігіндегі аумаққа 3D және кенорынның ұзындығына 2D сейсмикалық барлау жұмыстарын жүргізу, тау-кен учаскесінің тереңдігін 550м-ге ұлғайту жоспарланып отыр.
Мұнай саласының маңызды мамандары жоғары өндірістік көрсеткіштерге жету жолында әлі де табандылық пен еңбекқорлық танытып, биік белестерді бағындыруға дайын.