«Жас келсе, іске!» деген тақырыптағы ойынға "ӨМГ" АҚ әлеуметтік әкімшілік департаменті директоры Тарас Алеуединов, персоналды басқару және дамыту директоры Ермек Көптілеев, жайдарманшы Мақсат Оңайбаев, "Қазақстан-Жаңаөзен" телеарнасының журналисі Айнұр Махамбетова, Жас мамандар кеңесінің төрағасы Бауыржан Бәйімбетов төрешілік етіп, көрермендермен бірге күлкі дәруменіне қарқ болды.
"№1,3 МГӨБ командалары өз деңгейінен көріне алмады. Жігіттерге босаңсымау керек. Әңгіменің санда емес, сапада екенін дәлелдеген 2 жігіттен тұратын АжТБ командасына риза болдым. ХжЭБ ұнады. ТТБ бүгін жақсы ойнады", - деді экс-жайдарманшы Мақсат Оңайбаев ойын қорытындысында.
Бас жүлдені ӨЭМБ, 1,2,3 орындарды АжТБ, ТТБ, №3 СҚКБ командалары алды. №1,3 МГӨБ командаларына кәсіподақ пен көрермен көзайымы жүлделері табысталды. ХжЭБ командасынан Қайрат Аманқосов үздік ойыншысы атанды.
Жүргізуші Арғынбек Қалбай алтын уақытын бөліп "Жайдарманға" келген көрермендер мен қазылар алқасына алғыс білдірді.