Залда мұнайлы мекеннің әр кен орнына арнайы бұрыш жасақталған. Солардың ішінде 40 жылдық тарихы бар Қаражанбас бұрышы – мұнай залының маңызды бөлшегі саналады. Оған орналастырылған әрбір жәдігер тамырын тереңге жайған қазыналы түбектің тарихынан сыр шертеді. Ақпарат тақтайшаларында жер астынан алынатын мұнайдың физикалық және химиялық қасиеттері жайлы мәліметтер болса, фотокөрмелерде кен орнының қалыптасу және даму тарихы бейнеленген. Сондай-ақ, витриналарда ардагер геологтар мен мұнайшылардың өмірі және қызметіне қатысты деректер топтастырылған.
Қаражанбас мұнайшыларының арнайы киімдері де ерекше көзге түседі. Оған қоса, колбаларда мұнай үлгілері, ұңғыма макеті және өндірісте қолданылатын жабдықтар бар. Бір сөзбен айтқанда, жаңа зал қара алтын өндірушілердің адал қызметі мен еңбекқорлығын сездіре отырып, кен орнының бүкіл ел үшін маңыздылығын айқындайды.
Қаражанбас – түбектің қазынасын қойнауына сақтаған қасиетті кен орын. «Қаражанбасмұнай» АҚ жыл сайын биік белестерді бағындырып, мұнайшылардың әлеуметтік жағдайын жақсартып, өңірдің дамуына үлес қосып келеді. Сондықтан музейдегі мұнай залы әлі де мол мұрамен толыға түседі. Құнды жәдігерлер жинақталған бұрыштар бабадан балаға мирас болып қала бермек.