Солтүстік Қотыртас кен алаңындағы №75 ұңғымасында орын алған өрт салдарынан күйік шалған аталған кен орнының зерттеу цехының операторына дәрігерге дейінгі жедел медициналық көмек көрсету жұмысына цех басшылары мен жұмысшылары, басқару аппаратының қызметкерлері, Төтенше жағдайлар департаментінен өртке қарсы қызметі, «Медикер-ӨМ» ЖШС, «Семсер-Өрт сөндіруші» ЖШС, «Кәсіби Әскерилендірілген Авариялық-Құтқару Қызметтерінің Республикалық Орталық Штабы» ЖШС «Ақ Берен» Атырау филиалының 89 маманы бір кісідей атсалысып, 32 арнаулы техника жұмылдырылды.
Аталған оқу-жаттығу шарасына «ҚазМұнайГаз» Ұлттық компаниясы» АҚ, Атырау облысы Төтенше жағдайлар департаменті, «Семсер-Өрт сөндіруші» ЖШС Батыс филиалы, «Ембімұнайгаз» АҚ өкілдері арнайы қатысты.
«Аталған ұңғымада зерттеу цехының операторы жұмыс жасап жатқан кезде ұңғы ысырмасы жабылмай қалып, мұнай бұрқағы атқылап, соңы өртке ұласады. Зардап шеккен адамға көмек көрсетіледі. Жаттығу белгіленген жоспар бойынша өтті, барлық қызметкерлер біркісідей атсалысқанын ерекше атап өткім келеді. Оқу-жаттығу жиындарының қорытындысы бойынша ұңғыма қасындағы өрт сөндірілді. Істен шыққан ысырма ауыстырылды. Құтқарушылар жедел әрекет етіп, тілсіз жауды ауыздықтап үлгерді, жарақаттанған адамға да дәл уақытында жедел көмек көрсетті», – деді «ҚазМұнайГаз» Ұлттық компаниясы» АҚ еңбекті және қоршаған ортаны қорғау департаментінің өрт қауіпсіздігі жөніндегі жетекші маманы Бауыржан Бадылбаев.
«Ембімұнайгаз» АҚ Бас директорының өндіріс жөніндегі орынбасары Қанатбек Қасымғалиев аталған іс-шара пандемия салдарынан болған 2 жылдық үзілістен кейін ұйымдастырылып отырғандығын, мұндай шаралардың апаттық жағдайға дайындықты пысықтау, кемшіліктерді анықтауға септігін тигізетінін жеткізді.