Энергетика саласына кездейсоқ адамдар келмейді. Мұнда тек ерекше төзімділік пен жауапкершілік иелері, тіпті ауысым аяқталса да жұмысқа деген ынтасы сөнбейтін жандар ғана қалады. Қайрат Бастарбекұлы Тастанбеков - дәл сондай жан. Оның электр энергетикасы саласындағы жалпы еңбек өтілі - 37 жыл. Бұл - бір рет таңдалған мамандыққа деген адалдықтың сирек кездесетін үлгісі.
Электр энергетикасы саласына әскерден кейін келдім. Техникумда білім алып, қалалық электр желілеріне өз мамандығым бойынша жұмысқа орналастым. Содан бері бір де бір күн үзіліс болған емес. Барлық 37 жылды – бастан-аяқ – осы энергетика саласында өткіздім», — деп еске алады Қайрат Бастарбекұлы.
Релелік қорғаныстан қосалқы станцияларды басқаруға дейін
Қайрат Бастарбекұлының еңбек жолы 1988 жылдың қыркүйегінде басталды. Шымкент электр желілері кәсіпорнында 2-ші разрядты электр монтері болып бастаған жас маман релелік қорғаныс пен автоматиканың қыр-сырына үңіле бастады. Бұл бағытты энергия жүйесінің «миы» деп атайды: себебі апатты дер кезінде оқшаулау немесе оның жаппай өшуге ұласуы дәл осы релелік қондырғылардың дәлдігіне тікелей байланысты.
Қазақстанның электр желілерін басқарушы ұлттық операторы - «KEGOC» АҚ-дағы ондаған жылдық еңбек Қайрат Тастанбеков үшін нағыз кәсіби шеберлік мектебі болды. Инженерден жетекші маманға дейінгі сатылардан өтіп, 2008 жылы Оңтүстік Қазақстан өңірінің басты күре тамырларының бірі — 500 кВ-тық «Шымкент» қосалқы станциясын басқарды. Мұндай стратегиялық нысанды басқару тек терең техникалық білімді ғана емес, сонымен бірге ұйымдастырушылық қабілетті де талап етеді.
Елеулі еңбегі үшін ол кәсіби қауымдастықтың жоғары бағасы — «Еңбек сіңірген энергетик» төсбелгісімен марапатталды.
Жаңа белес: «Түркістан БГҚ»
Қайрат Тастанбековтің мол тәжірибесі Түркістан облысындағы қуаты 1000 МВт-тық бу-газ қондырғысы (БГҚ) негізіндегі жаңа электр станциясының құрылысында сұранысқа ие болды. Электрмен жабдықтау цехын басқара отырып, ол жаңа буындағы нысанның жұмысына белсене араласты. Энергетика саласындағы 37 жылдық тәжірибені ешқандай алгоритмдермен алмастыру мүмкін емес.
«Құрметті әріптестер! Баршаңызды кәсіби мерекеміз - Энергетиктер күнімен құттықтаймын! Мен Астанаға барып, Мемлекет басшысының атынан «Ерен еңбегі үшін» медалін алдым. Көңіл-күйім аспанда, қуанышымда шек жоқ! Әрқайсыңызға осындай марапаттарға ие болуды тілеймін. Рақмет!» - деді Қайрат Бастарбекұлы.
Қайрат Тастанбеков үшін бұл марапат даңғазалықтың себебі емес. Ол әлі де өзіне талапшыл, қарапайым, тәртіпке берік және білгенін жас энергетиктермен бөлісуге әрқашан дайын. Өйткені ол үшін ең басты марапат - жұмыс істеп тұрған турбиналар мен трансформаторлардың бірқалыпты үні және қазақстандықтардың үйінде дер кезінде жағылған жарық.