Жаңа қуат өндірістік нысандарды қосу мен генерация үшін қосымша резерв қалыптастырады. Нақты айтқанда, қосалқы станцияны кеңейту Қарағандыдағы қуаты 779 МВт индустриалдық паркті электр желісіне қосуға және қуаты 500 МВт жел электр станциясын интеграциялауға мүмкіндік береді.
Жоба аясында қосалқы станциядағы 500 кВ тарату құрылғысының сұлбасы да жаңғыртылып, 220 және 10 кВ жаңа жабдықтар орнатылды. «Нұра» қосалқы станциясын күшейту KEGOC-тың Ұлттық электр желісін жаңғырту бағдарламасының жалғасы болып табылады.
Бұған дейін «Састөбе» және «Сарыөзек» қосалқы станцияларында қосымша трансформаторлық қуат іске қосылған болатын. Жаңа қуат желінің өткізу қабілетін және Қарағанды энергия торабының электрмен жабдықтау сенімділігін арттырып, өңірдің одан әрі өнеркәсіптік дамуы үшін инфрақұрылымдық резерв қалыптастырады.
Жобаны іске асыру барысында қазақстандық өндірістің жабдықтары мен материалдары пайдаланылғанын атап өткен жөн.