Есқуат Кетебаев ҚБМ-дағы еңбек жолын осыдан 10 жыл бұрын №2 МӨЦ-да қатардағы оператор лауазымынан бастады. Кейін ол сорап қондырғыларының машинисі қызметіне ауысып, соңғы жылдары жаңадан ашылған №3 МӨЦ-да табысты еңбек етті. Білікті маман ісіне адал, тиянақтылық пен жауапкершілікті тең ұстаған жұмысшы.
Ал Демеухан Нысанбаев ТКД-не қарасты №1 гараждың жөндеу-механикалық цехында 12 жыл табан аудармай еңбек етті. Алдымен токарь болып жұмыс істеген ол, кейін құрал-сайманшы қызметіне ауысты. Жұмысшы арнайы техникалар мен көліктерді жөндеу кезінде қажетті құралдарды үлестіріп, саймандардың тазалығы мен талапқа сай болуына жауапты.
Қаражанбасқа өмірінің 25 жылдан астам уақытын арнаған Ахмет Имашев бастапқыда №2 МӨЦ-да оператор болып еңбек етті. Қызметін ГЦ-да жалғастырған машинист газ компессорлық қондырғыларының жұмысын бес саусағындай білетін кәсіби маман.
Зейнетке шыққан жұмысшылардан әріптестерінің үйренгені мол. Олар жастарға қызметтен бөлек, игі істің жанынан табылып, ел үшін ерінбей еңбек ету керектігін үнемі айтып отырады. Құрметті демалыс алдында ұжым құрметіне бөленген ардагерлер ізбасарларына ризашылығын білдіріп, ақ батасын берді.