Келісім «Атырау облысында магистральдық құбырларды (этан, пропан) бір дәлізде салу» жобасы бойынша EPC-келісімшартты қаржыландыру мақсатында 15 жыл мерзімге кредиттік желі ашуды көздейді. Кредит бойынша қамтамасыз ету ретінде «Самұрық-Қазына» АҚ-ның корпоративтік кепілдігі ұсынылады.
«Қытайдың даму банкімен жасалған келісім Қазақстан мен Қытайдың энергетика саласындағы көпжылдық ынтымақтастығының жалғасы болып табылады. Бүгінде осы әріптестіктің маңызды бағыттарының бірі – Қазақстанда газ химиясын дамыту. Тартымды шарттармен берілетін ұзақ мерзімді қаржыландыру болашақ өндірістерге қажетті инфрақұрылымның уақтылы салынуын қамтамасыз етіп қана қоймай, екі ел арасындағы көпжылдық әріптестікті одан әрі нығайтуға мүмкіндік береді», – деп атап өтті «ҚазМұнайГаз» ҰК АҚ Басқарма төрағасының орынбасары Диана Арысова.
Теңіз кен орнындағы газ сепарациялау кешенінен Қарабатанға дейін бірыңғай техникалық дәлізде әрқайсысының ұзындығы шамамен 210 шақырым болатын екі құбыр тартылады. Жылына 1,6 млн тонна өткізу қабілеті бар этан құбыры салынып жатқан полиэтилен зауытын шикізатпен қамтамасыз етеді. Ал жылына 1,1 млн тонна өткізу қабілеті бар пропан құбыры арқылы жұмыс істеп тұрған полипропилен зауытына шикізат жеткізіледі.
«Біз еліміздің мұнай-газ химиясы кластерінің маңызды бөлігіне айналатын магистральдық этан және пропан құбырларының құрылысын бастап кеттік. «Самұрық-Қазына» қоры мен «ҚазМұнайГаздың» жан-жақты қолдауының арқасында Қытайдың даму банкімен кредиттік келісімге қол қойдық. Бұл – бірлескен жұмысымыздың маңызды нәтижесі әрі жобаны ұзақ мерзімді қаржыландыруды қамтамасыз ету жолындағы кезекті қадам. Банктің Қазақстандағы газ-химия инфрақұрылымын дамытуға қатысуы қытайлық әріптестердің сенімін көрсетіп, елдеріміз арасындағы қаржы-экономикалық ынтымақтастықты нығайта түседі», – деп атап өтті «KMG PetroChem» ЖШС Басқарма төрағасы Диаз Диянов.
Жобаны іске асыруға арналған EPC-келісімшартқа 2025 жылғы қарашада China Petroleum Pipeline Engineering Co., Ltd. компаниясы жетекшілік ететін, құрамына CITIC Construction Co., Ltd. және «ЧППИ Қазақстан» ЖШС кіретін консорциуммен қол қойылды.
Келісімшарт жобалау құжаттамасын әзірлеуді, жабдықтарды сатып алуды, құрылыс-монтаждау және іске қосу-баптау жұмыстарын жүргізуді, сондай-ақ нысанды пайдалануға беруді қамтиды.