Аталған шараға аудан әкімі мен өндірістік басқарма басшылары және кәсіподақ төрағасы қатысты. Жетібай ауылының әкімі Қуаныш Асанов ел дамуының негізгі көрсеткіштерінің біріне баланған мұнай өндіру ісіндегі мұнайшылар ұжымының, соның ішінде қайсар қыз-келіншектердің еңбегін ерекше бағалап, алғыс білдірді.
«Жетібаймұнайгаз» өндірістік басқарма басшылары Болат Сейітмағанбетов, Хэ Цзиньбо және «Жетібаймұнайгаз» ӨБ кәсіподақ ұйымының төрағасы Бекес Құлмұрынов өңірдің өндірісін өркендетуге үлес қосқан бірқатар әйел азаматтарды құттықтап, Басқарма атынан Алғыс хаттар мен Құрмет грамоталарын табыстады.
Шара соңы Өскінбаев атындағы облыстық филармония жұлдыздарының концертіне ұласып, елімізге белгілі Бауыржан Ретбаев, Асанәлі Көшеров сынды таланттар әсем әннен шашу шашты. Мерейлі күні мереке төрінен табылған мұнайшы қыз-келіншектер үшін көктем мерекесі жақсы көңіл-күймен басталды.