KazService өкілдерінің айтуынша, Мемлекет басшысының 2023 жылдың қыркүйегіндегі тапсырмасынан бері Қазақстанның мұнай-газ саласы нарығында елеулі өзгерістер орын алған. Үкімет 20 негізгі бастаманы қамтитын ірі мұнай-газ және мұнай-химия жобаларын дамытудың 2023–2027 жылдарға арналған кешенді жоспарын бекітті.
Мемлекет басшысының, Үкімет, Энергетика министрлігі, «Самұрық-Қазына» қорының қолдауының арқасында соңғы екі жылда QazaqGaz тұтынушыларды табиғи газбен үздіксіз қамтамасыз ету, инфрақұрылымдық жобалар, ресурстық базаны кеңейту, газ саласының инвестициялық тартымдылығын арттыру бойынша бірқатар негізгі міндеттерді жүзеге асырды.
Газ секторының қарқынды дамуы және оның жаһандық энергетикалық трансформация жағдайындағы маңыздылығы QazaqGaz-ға отандық сервистік компаниялармен ынтымақтасу және перспективалық жобаларды жүзеге асыру үшін жаңа мүмкіндіктер ашады.
«QazaqGaz өз жұмысында отандық серіктестермен ашық диалог қағидаттарын ұстанады. Біздің саланың жетістігі оның барлық қатысушыларының үйлесімді жұмысына тікелей байланысты екенін түсіну маңызды», - деді «QazaqGaz» ҰК» АҚ басқарма төрағасының бірінші орынбасары Мейірбек Ихсанов. Ол негізгі жобаларды жүзеге асыруда қазақстандық компаниялардың үлесін арттыруға ерекше көңіл бөлініп отырғанын атап өтті.
Жергілікті кәсіпорындардың позициясын нығайту және оларды газ саласындағы негізгі жобаларға тарту бойынша бірлескен жұмыс отандық өнеркәсіптің дамуына ғана емес, Қазақстанның бүкіл энергетикалық инфрақұрылымының тұрақты өсуін қамтамасыз етуге ықпал етеді.