Қаражанбасмұнайда «Жас маман күні» жобасы басталды

Екі күндік шара жағалаудағы ең үздік демалыс аймақтарында өтіп жатыр. Мұнда кен орнында және орталық кеңседе жұмыс істейтін 100-ден астам жас маман спорттық, шығармашылық, ғылыми бағыттағы оқыту іс-шараларына қатысуда. Ашылу салтанаты барысында ҚБМ Бас директорының бірінші орынбасары Қуанышбай Нұрғалиев мұнайшыларды жобаның сәтті басталуымен құттықтап, компания өмірінде жас кадрлардың рөлі маңызды екенін атап өтті.

«Жастар – прогрестің қозғаушы күші және олар болашақта компания дамуын жалғастыратын жандар. Қазір сіздер үшін ізденістер мен жаңалықтардың, шабыт пен ең батыл идеяларды жүзеге асырудың жарқын кезеңі. Сондықтан біз әрқашан сіздердің бастамаларыңызды қолдауға дайынбыз. Тек ҚБМ емес, тұтас еліміздің болашағы өздеріңіздей білімді, жігерлі, еңбекқор жастардың қолында. Сондықтан жас мұнайшылардың бәсекеге қабілетті болуы аса маңызды. Бұл жоба дәстүрге айналып, өз нәтижесін беріп келеді», – деп атап өтті ҚБМ басшылығы.

Бұдан соң қызықты сайыстар басталды. Жас мамандар тимбилдингке қатысу үшін командаларға бөлінді. Ұлттық спорт түрлері бойынша өткізілген жарыстар ерекше ұжымдық рух сыйлады. Жас мұнайшылар арқан тарту, асық ату, қой көтеру, ләңгі тебу, көкпар сияқты ойындарда күш сынасты. Әрі қарай қатысушылар бірліктің белгісі ретінде жұдырықтай жұмылып, киіз үй тікті.

«ҚБМ өз мамандарымен – компанияның нағыз патриоттарымен мықты. Жобаның алғашқы күні біз өз энергиямызды барынша пайдаландық, ал ертең білімімізді арттырамыз. ҚБМ басшылығы бізді әрдайым қолдайды, біріктіреді, ынталандырады, үйретеді. Біз де өз кезегімізде аянбай жұмыс істеуге дайынбыз», – деп атап өтті жас мамандар.

Тартысқа толы болған сайыстың бірі – «Арчери таг» тактикалық ойыны. Садақ ату арқылы сынға түсетін жарыста командалар бір-бірімен бәсекелесті. Ойын кезінде әр қадамды нық жоспарлай отырып, стратегиялық әрекет ету қажет. Жарыстардан соң ойындардың қорытындысы бойынша жеңімпаз командалар мақтау қағаздарымен және сыйлық сертификаттарымен марапатталды.