Желмен жұмыс істейтін станция салынады

"Самұрық-Энерго" АҚ Қазақстанның энергияға тапшы оңтүстік өңірінде жаңартылатын қуат көзінің нысанын салуда. Келешекте 300 МВт-ға дейін кеңейтілетін, қуаты 60 МВт жел-электр станциясы (ЖЭС) Алматы облысының Шелек ауылында орналасатын болады.

Алматы ЖЭО-лары, Қапшағай және Алматы СЭС каскадтары, Есік СЭС-і, Мойнақ СЭС-і, Қаратал СЭС-і өңірдегі электр энергиясының негізгі көздері болып табылады.

Бүгінгі таңда өзінің қуат өндіру көздері болмағандықтан, Алматы облысының электр энергиясына деген қажеттілігін жергілікті қуат көздері 50%-ке ғана қанағаттандырады.

"Шелек дәлізінде жел-электр станциясын салу арқылы парник газдарын (СО2) шығару жылына 206 мың тоннаға азаяды, сондай-ақ жылына 89 мың тонна шартты отын ауыстырылады. Оның үстіне, жел электр станциясы қоршаған ортаға әсер етпей отырып, электр энергиясының қорын толықтыруға мүмкіндік береді", - дейді "Самұрық-Энерго" АҚ жобалау кеңсесінің басшысы Ернұр Жиенбаев.

"Самұрық-Энерго" АҚ еншілес компаниясы – "Энергия Семиречья" ЖШС іске асырудағы нысанның құрылысы кезеңінде 300 жұмыс орны құрылып, станция іске қосылғаннан кейін тұрақты негіздегі 14 жұмыс орны пайда болмақ. ЖЭС жылына 225 750 мың кВтс электр энергиясын өндіреді деп күтілуде. Жобаның аяқталу мерзімі – 2020 жыл.

Атап өтейік, станция жиынтық қуаты 60 МВт болатын 24 жел энергетикалық қондырғыдан, қосалқы станциядан және электр желілерінен тұратыны күтілуде. Нысанның агрегаттары жел станциясын автоматты басқару жүйесіне негізделген аппараттық-бағдарламалық кешен арқылы реттеледі. Бұл моделдің артықшылығы сол, оны суық ауа райы (–30…+43 С), 10 балдық сейсмикалық белсенділік және желдің екпіні II сынып жағдайында пайдалануға болады.

Естеріңізге сала кетейік, "Самұрық-Энерго" АҚ бұған дейін ЖЭК саласындағы 2 жобаны: Қапшағай қаласындағы 2 МВт Күн электр станциясын ("Samruk-Green Energy" ЖШС) және Ерейментау қаласындағы 45 МВт жел-электр станциясын ("БЖЭС" ЖШС) іске асырған болатын.