ЖЭО-да көмір қоры 30 пайызға өсті

Қатты отынның басым бөлігі – 40,1 млн тоннасы ЖЭО-ға жеткізілді. Бұл көрсеткіш өткен жылыту маусымының ұқсас кезеңімен салыстырғанда 910 мың тоннаға өсті. Қазіргі уақытта 29 ЖЭО-ның 28-інде отын қоры нормадан жоғары. Жиынтық қор 5,4 млн тоннаны құраса, бұл өткен жылғы деңгейден 31% жоғары.

Тұрғындар үшін 6,1 млн тонна тасымалданды. Қазақстан бойынша коммуналдық-тұрмыстық көмір қоры 450 мың тоннадан асты. Бұл көлем тұрғындардың көмірге деген жоғары сұранысын қанағаттандыру үшін жеткілікті.

Биылдың желтоқсан айына көмір тасымалдау жоспары 848,4 мың тоннаны құрады, 11 күн ішінде 235 мың тонна тиелді. Тиеп-жөнелтудің төмендеуі қоймаларда қорлардың болуына және өңірлік көмір операторларынан көмір разрездеріне өтінімдердің болмауына байланысты.

Көмір тасымалдауға 20 мыңға жуық жартылай вагон, оның ішінде энергетикалық көмір тасымалдау үшін - 10,5 мың бірлік, халыққа көмір тасымалдау үшін - 9,5 мыңға жуық вагон тартылды.

Облыстар мен республикалық маңызы бар қалаларды коммуналдық-тұрмыстық көмірмен қамтамасыз ету мәселелері өнеркәсіп және құрылыс министрлігінің алаңындағы тәуліктік кеңестерде талқыланады.