ҚТЖ мен QazaqGaz компаниялары қашан IPO-ға шығатыны белгілі болды

ҚТЖ IPO-ға шығуға дайындалып жатыр, ал «QazaqGaz» әзірге дайын емес. Оның IPO-ға шығу мерзімі 2027-2028 жылдарға ауысуы мүмкін. Бұл туралы Kazinform агенттігі жолдаған сауалға «Самұрық-Қазына» АҚ-ның ресми жауабында айтылған.

— ҚР Үкіметінің 2020 жылғы 29 желтоқсандағы №908 қаулысына (Жекешелендірудің кешенді жоспары) сәйкес, «Қазақстан темір жолы» ҰК» АҚ (ҚТЖ) және «QazaqGaz» ҰК» АҚ IPO өткізу арқылы бәсекелестік ортаға берілуі тиіс. ҚТЖ, кез келген басқа актив сияқты, IPO қарсаңында оның инвестициялық тартымдылығын арттыру үшін сатуға дейінгі дайындықты қажет етеді. Осыған байланысты Қор компаниямен бірлесіп және ҚР Үкіметінің келісімімен тиісті жұмыстарды жүргізіп жатыр. ҚТЖ IPO-сының нақты мерзімі мен құрылымы сатуға дейінгі дайындық шараларының аяқталуына қарай, инвестициялық банктер сияқты тәуелсіз кеңесшілердің ұсыныстарын ескере отырып, сондай-ақ нарық бойынша қолайлы жағдай болғанда айқындалады, - делінген хабарламада.

Сондай-ақ қор мәлімдемесінде «QazaqGaz» компаниясының IPO-ға шығуы бірнеше жылға шегерілуі мүмкін екені жазылған.

— QazaqGaz IPO-сын өткізуге әзірге ерте деп санаймыз, өйткені компанияның қазіргі және болжамды қаржы әрі операциялық көрсеткіштері IPO сәтті өтуі үшін инвестициялық тартымды активтің талаптарына толықтай сай емес. Қор мен QazaqGaz ҚР Үкіметімен өзара бірлесіп осы бағытта жұмыстарды жүргізіп жатыр. QazaqGaz IPO-сын өткізу мерзімін компанияның қаржылық жағдайының жақсаруына қарай 2027-2028 жылдарға ауыстыру қажет деп санаймыз, - делінген жауапта.