46 жылын мұнай саласына арнаған ардагер

Биыл өндіріс озаты 70 жылдық мерейтойын атап өтті. Десек те, оның мұнайшылар қатарына енді қосылған сәті әлі күнге дейін көз алдында. Айгүл Сәденова еңбек жолын 1975 жылы Жетібай кен орнындағы ғылыми-зерттеу жұмыстары цехының операторы болып бастады. Онда 20 жылдан астам уақыт жұмыс істеген Айгүл, кейін ҚБМ орталық кеңсесіне геолог болып ауысты. ҚБМ-ға келгеннен бастап оның компания дамуына қосқан үлесі орасан зор.

«Тоқсаныншы жылдары мұнай саласы дағдарысқа ұшырады, бұл кезде Қаражанбаста тоқтаусыз жұмыс жүргізіліп жатқан еді. Мұнайшыларға қолайлы жағдай жасалмағандықтан, жұмыс істеу қиынға соқты. Бірақ біз бар күшімізді салып, әріптестермен бірге барлық қиындықтарға қарсы тұрдық. Қазіргі айырмашылық жер мен көктей. Мен қанатын кеңге жайған ҚБМ-ды мақтан тұтамын», – дейді Айгүл Сәденова.

Ол компанияға келген шақта, мұнай өндіру бірнеше учаскеде ғана жүргізіліп жатқан еді. Бірақ жыл өткен сайын кейіпкеріміздің көз алдында жаңа мұнай қабаттары зерттеліп, дами түсті. Жаңа ұңғымалар бой көтеріп, Маңғыстаудың жер қойнауынан алынатын қор көлемі артты. Ардагер геолог еңбек жылдарын, жетістікке ұмтылған әрбір әріптесі мен Компанияны сағынышпен еске алады.

«Мен тағдырымның Қаражанбаспен тоғысқаны үшін өте ризамын. Бұл жақтан өз ісін сүйетін, екінші отбасымды, яғни әріптестерімді таптым. Әлі күнге дейін ардагерлерге барып, көңіл бөліп, қамқорлық көрсетіп жүрген ҚБМ ұжымына алғысым шексіз», – дейді ол.

Айгүл Сәденова мұнай саласындағы жұмысын үй шаруасымен шебер үйлестіре білді. Қамқор ана қазір 12 немересіне жылулық пен махаббат сыйлап, адалдыққа тәрбиелеп отырған аяулы әже.