5 000 қатысушы және әлемдік финалға жолдама: Астанада Alem Tech Fest 2026 фестивалі өтті

Биылғы фестивальге Қазақстан, Қырғызстан, Өзбекстан, Түрікменстан, Эстония, Вьетнам және Қытай елдерінен 5 000-нан астам қатысушы жиналды. Үш күнге созылған іс-шара барысында жас өнертапқыштар дрондар мен автономды роботтардан бастап зымыран жасау, жасанды интеллект жүйелерін әзірлеу және бағдарламалау бағыттарындағы жобаларын ұсынды.

Фестиваль жас ғалымдар мен инженерлер үшін тәжірибе алмасу, халықаралық байланыс орнату және өз әзірлемелерін сарапшылар назарына ұсыну мүмкіндігін берді. Қатысушылар өзара командалық жұмыс дағдыларын жетілдіріп, күрделі техникалық міндеттерді шешу бойынша білімдерін сынады.

Фестиваль аясында «Самұрық-Қазына» АҚ Басқарма төрағасы Нұрлан Жақыпов командалардың инженерлік дайындығының жоғары деңгейін атап өтті. Оның айтуынша, ұсынылған технологиялық шешімдер тек білім беру мақсатында ғана емес, сонымен қатар нақты өндірістік және әлеуметтік міндеттерді шешуге әлеуеті бар.

Alem Tech Fest 2026 қорытындысы бойынша үздік командаларға Хьюстон қаласында (АҚШ) өтетін FIRST Championship әлемдік финалына қатысу сертификаттары табысталды. Бұл — қазақстандық және өңірлік командалар үшін халықаралық деңгейде өз шеберліктерін дәлелдеуге берілген үлкен мүмкіндік.

Alem Tech Fest жас ұрпақтың ғылым мен технологияға қызығушылығын арттырып қана қоймай, елдегі STEM-білім беруді дамытуға және инженерлік кадрлардың жаңа буынын қалыптастыруға елеулі үлес қосуда.