630-дан астам әйел "бастық" болып істейді

Кездесу барысында Ergon Associates директорының орынбасары Кирстен Ньют атап өткендей, "Самұрық-Энерго" компаниясы тең мүмкіндіктерді беру жөніндегі алдыңғы қатарлы халықаралық тәжірибені Қазақстанның энергетика секторында енгізумен байланысты ЕҚДБ-ның жобасын іске асыруда айтарлықтай нәтижеге қол жеткізді. Енді, Ergon өкілінің айтуынша, компанияның тәжірибесі республиканың энергетика саласында жұмыс істейтін барлық ұйымдарға ұсынылатын болады.  

Гендерлік саясаттың жалпы мәселелерінен тыс, кездесуге қатысушылар "Әйелдердің менеджменттегі орны: көшбасшылық байланыстарды нығайту" тақырыбында пікір алмасты. Талқылау қорытындысы бойынша сарапшылар әйелдердің мүмкіндіктерін және басшылық лауазымдардағы өкілдерін кеңейту жөніндегі жұмысты жалғастыруды ұсынды. Алдыңғы қатарлы халықаралық тәжірибе ретінде Германия, Франция, Ұлыбритания және Сербия секілді елдер мысалға алынды.

"Тұтас алғанда, бүгінгі кездесу әйелдердің басқару саласындағы және өндірістегі рөлін ынталандыруда "Самұрық-Энерго" АҚ-ның дұрыс және тиімді жолмен келе жатқанын көрсетті", - деп атап өтті ЕҚДБ гендер және инклюзия саласындағы бас экономисі Томас Бергенхолтц.

Бүгінде қазақстандық аса ірі электр энергиясы холдингіне қарасты компаниялар тобында 4700-ге жуық қыз-келіншек жұмыс істейді. Олардың 630-дан астамы – басшылық қызметте.