Абыройлы еңбектің берекелі зейнеті

Компанияның көп жылғы тарихы өндірістің өркендеуі жолында ұзақ жылдар бойы жемісті еңбек етіп жүрген мұнайшылар қызметімен қатар жазылып келеді. Солардың қатарында технологиялық көлік департаментінің жылжымалы компрессор машинисі Сәрсенбай Шабаев та бар.

Алпыстың асқарын бағындырған кейіпкеріміз арайлы Ақкетіктің тумасы. Ол Қаражанбастағы машинистік мансабын осыдан 35 жылға жуық уақыт бұрын бастаған. Мамандыққа деген махаббат пен қызметке деген құлшыныс оны өндірістің өріне жетеледі. Ісіне адал, жауапкершілік пен еңбекқорлықты серік еткен жұмысшы күні бүгінге дейін табан аудармай, өзіне жүктелген міндетті кәсіби орындап келеді.

«Жұмысшы үшін ең басты нәрсе – өз ісін жақсы көру. Қызығы мен шыжығы қатар жүретін мамандықтың иесі болғаныма еш өкінбеймін. Өйткені, жұмысым сүйікті ісіме, ал әріптестерім ең жақын достарыма айналды», – дейді Сәрсенбай Шабаев.

Қызметте білікті машинист отбасында асыл жар, асқар тау әке, ақылшы ата. Еңбек адамы ұзақ жылғы қызмет белесін бағындырып, құрметті демалысқа шығатын шаққа жетті. Құрмет пен жылы лебізге бөленген Сәрсенбай Шабаев әріптестеріне алғысын білдіріп, жауапты қызметін жас буынға сеніммен тапсырды.