Адал еңбек абыройға бөлейді

Кейіпкеріміздің Бозашы түбегіндегі еңбек жолы осыдан 35 жылдан астам уақыт бұрын басталды. Бұл «Қаражанбастермнефть» мекемесінде өндіріс жұмыстары жандана бастаған шақ еді. Қызметін компрессорлық қондырғы машинисі болып бастаған Мұратбекке алғашында жер астына ауа айдау жұмыстары жүктелді. Соңғы 20 жыл көлемінде қабат қысымын ұстау цехында слесарь, артынша сорап қондырғысының машинисі болып еңбек етіп келеді. Алдыңғы буын ағалардың тәлімін алып, тәжірибе жинаған ол бүгінде өз ісінің майталман маманына айналды.

«Біздің жұмыста жауапкершілік бірінші орында тұруы тиіс. Себебі біз мұнай дайындау және айдау цехында өңделген шикізаттан қалған суды жер астына қайта айдау жұмыстарын жүргіземіз. Осылайша жер асты қабаттарының қысымын ұстап тұруға атсалысамыз. Бұл өндірістегі ең маңызды процестің бірі», – дейді кейіпкеріміз.

Бақыттың кілтін еңбектен тапқан Мұратбек жастайынан самбо күресін серік еткен балуан. Спорт шеберіне үміткер ертеректе Қаражанбаста өткен қазақша күрес сайысында топ жарған алғашқы чемпиондардың бірі. Өлке өндірісін өркендетуге үлес қосып жүрген жұмысшы үш ұлы мен одан тараған 6 немересіне өз ісіне деген адалдық кез келген маманды биік белестерге жеткізетінін үнемі айтып отырады.

"Қаражанбасмұнай" АҚ баспасөз қызметі