Алматы – Қонаев бағытында пойыз жолға шығады

11 қарашадан бастап Алматы – Қонаев пойыз бағыты ашылады, деп хабарлады министрліктің баспасөз қызметі.

Мемлекет басшысының тапсырмасына орай ҚР Индустрия және инфрақұрылымдық даму министрлігі Алматы және Қонаев қалалары арасында жаңа жолаушылар темір жол бағытын ашу мәселесін қарастырған болатын.

Пойыз тәулігіне бір рет жүреді. Жылжымалы құрам Алматы-1 станциясынан сағат 06:44-те жөнелтіліп, Қапшағай станциясына сағат 08:35-те келеді. Ал Қапшағай станциясынан сағат 19:15-те жөнелтіліп, Алматы-1 станциясына сағат 20:50-де келеді.

Пойыз құрамында жалпы жолаушылар сыйымдылығы 175 орынды құрайтын 3 вагон бар. Тасымалдауды «Жолаушылар тасымалы» АҚ жүзеге асырады.

Айта кетерлігі, Мемлекет басшысы жаңа пойыз бағытын ашу туралы тапсырмасын 19 қазанда Алматы облысына жасаған сапары аясында берген болатын.