Alstom Қазақстанның 4 өңірінде электровоз өндірісін ашады

Роман Василенконың айтуынша, «Alstom» компаниясы Астана, Алматы, Жамбыл және Түркістан облыстарында электровоз шығарып, оларға қызмет көрсететін өндіріс орнын ашуды жоспарлап отыр. Оған қоса, бұл жобаны іске қосу барысында жергілікті мыңдаған маманды дайындау қажет болады.  

Айта кету керек, өткен жылдың қарашасында Мемлекет басшысы Қасым-Жомарт Тоқаевтың Францияға ресми сапары аясында «Қазақстан темір жолы» ҰК» АҚ мен «Alstom Transport SA» АҚ арасында бірқатар келісімге қол қойылған болатын.

Құжатқа сәйкес, Alstom компаниясы 2023-2029 жылдар кезеңінде қазақстандық зауытта ЭҚЗ электровоз шығарады және «Қазақстан темір жолы» ҰК» АҚ үшін 245 электровоз жеткізіп береді. Төрт өңірде ашылғалы отырған өндірістік жобаларды жүзеге асыруға «Alstom» 50 миллион еуро шамасында инвестиция салуды көздеп отыр. Бұл еліміздегі электровоздардың қазіргі тапшылығы мәселесін шешеді және қазақстандық жүк жөнелтушілерге сапалы қызмет көрсетуге мүмкіндік бермек.

Брифинг барысында Роман Василенко былтыр Қазақстан мен Еуропалық одақ арасындағы өзара тауар айналымы 27,6%-ға өсіп, 40 млрд долларға жеткенін атап өтті.

«Қазақстан «екінші буын» келісіміне – ЕО және оған мүше мемлекеттермен кеңейтілген әріптестік пен ынтымақтастық туралы келісімге қол қойған және оны ратификациялаған аймақтағы жалғыз ел болып қала береді. Бұл ретте Қазақстан өткен жылы сирек кездесетін металдар, «жасыл» сутегі, аккумуляторлар, көлік-логистикалық әлеуетті дамыту, сондай-ақ тауарларды жеткізу тізбегін әртараптандыру сияқты жаңа салаларда ынтымақтастық орнатты», – деді Роман Василенко.

Сонымен қатар ол Транскаспий халықаралық көлік бағытын дамыту жөніндегі жұмыстар қалай жүріп жатқанына тоқталды.

«Кейінгі уақытта біздің азаматтарымыз Транскаспий халықаралық көлік бағыты туралы жиі естіп жүргені белгілі. Оны дамыту бойынша ауқымды жұмыс жүргізілуде. Осы жылдың мамыр айында Алматыдағы Орталық Азия - Еуропалық одақ екінші экономикалық форумы аясында Еуропалық қайта құру және даму банкінің Транскаспий халықаралық көлік бағытын бағалау бойынша зерттеу қорытындыларының тұсаукесері күтілуде. Содан кейін Еуропалық одақпен және басқа да мүдделі серіктестермен бірлескен жобаларды дереу іске асырамыз деп үміттенеміз», – деді Сыртқы істер министрінің орынбасары.