Алтынайдың алтыны

Жуырда Ақтөбе қаласының триатлоннан өткен ашық чемпионатында Атырау МҚБ күрделі құрылыс және күрделі жөндеу қызметінің инженері Алтынай Нұғманова жүлделі бірінші орынды иеленді.

Триатлоннан ашық чемпионатта 150-ден астам спортшы жүзу, велосипедпен жарыс және жүгіруден Олимпиадалық ара қашықтықты бағындыруға бақ сынады. Триатлон талабы бойынша, алғашқы сынақ жүзу – 1,5 шақырым болатын. Су қоймасында қатты ағыстың әсерінен бұл сында бәрі бірдей қашықтықты уақытында бағындыра алмады.

Ал Алтынай бұл сыннан сүрінбей өтіп, кезектегі велосипедпен жарыста 50 шақырымды, жүгіруден 10 шақырымды кедергісіз өтіп, өз қатарластары арасынан бірінші орынды иеленді. Триатлоннан жеңімпаздарға ақшалай сертификаттар табысталды. Жүлдегерлер ақшалай сыйлықтарын бірауыздан Ақтөбе облысы аутист балалардың ата-аналары Қауымдастығының қорына аударды.

Алтынай Нұғманова Атырау МҚБ жас мамандар Кеңесінің төрайымы, спортшы. Атырау, Орал, Ақтөбе қалаларында өтетін велосипед жарысы, марафон және жүзуден ашық сайыстарға тұрақты қатысып жүр.