Амал келді – жыл келді

Жыл басын бірге қарсы алу үшін таңғы 5-те автобекет алаңында бас қосқан қаламқастықтар көрісіп, бата алып, арқа-жарқа күйде аман-саулық сұрасты. Компания мен өндірістік басқарма басшылары, сервистік кәсіпорын жетекшілері жиналған мұнайшыларды дәстүрлі халықтық мейраммен құттықтап, жүрекжарды ақ тілектерін арнады.

Бұл күнгі жұмыс уақытын жетібайлық мұнайшылар да ерекше көңіл-күймен бастады. Таң сәріден «Несібеміз мол болсын» деген ниетпен қара қазан көтеріліп, мерекелік дастархан жайылды. Көрісуге жиналғандарды басшылық қауым құттықтап, үлкендер жағы күн мен түн теңесетін осынау ұлы мерекеде ел мен жердің амандығын тілеп, баталарын берді. Орталық кеңсе қызметкерлері үшін де ерекше күн болды. Амал мерекесінде күнделікті жұмыс киімдерін камзол мен шапанға ауыстырып, төс қағыстыра көріскен ұжымдастар шат-шадыман көңілде жүрді.

«Амал туды жыл келді!» деп қуанған ата-бабаларымыздың жақсы дәстүрі бейбіт елімізде жарасымды жалғасын таба бергей!

Дереккөз: «Маңғыстаумұнайгаз» АҚ Facebook парақшасы