Ардагер мұнайшыға ілтипат

Қазақ КСР Ғылым, техника және білім саласындағы Мемлекеттік сыйлықтың лауреаты, «Құрмет», «Құрмет белгісі» ордендерінің иегері, Атырау,Жаңаөзен қалаларының, Атырау облысы Жылыой және Қызылқоға аудандарының Құрметті азаматы Махамбет Батырбаевтың мерейлі 80 жасқа толуына арналған шараға еліміздің ардагер мұнайшылары, «ҚазМұнайГаз» ҰК» АҚ және Бас компанияның еншілес мекемелерінің басшылығы, «Ембімұнайгаз» АҚ ұжымы қатысты.

Мерейтойға шақырылған қонақтар, соның ішінде еліміздің мұнай-газ саласында ұзақ жылдар үзеңгілес еңбек еткен аға буын кешегі күндердегі жылы естеліктерге тоқталып, Махамбет Демешұлының ел экономикасын өркендету жолындағы табыспен өрілген еңбек жолдарына алғыстарын білдірді.

Ембіліктер мерей жас иесіне ыстық ықыластарын арнай отырып, құрметпен иығына шапан жапты.

Салтанатты шарада мерейжастың өмір жолына арналған деректі фильм көрсетіліп, мерекелік концерттік бағдарлама жұртшылықтың назарына ұсынылды.