Астанада неміс білім беру стандарттары бойынша мектеп ашылады

Германия Федералдық Республикасының Қоныс аударушылар және аз ұлттар істері жөніндегі Федералдық үкімет уәкілі Бернд Фабрициус бастаған делегация Астанадағы болашақ қазақ-неміс мектебінің құрылыс алаңына барды. Жоба ҚР Президентінің 2023 жылы Германияға сапарында орнатылған келісімдер аясында жүзеге асырылып жатыр.

Мектеп құрылысы «Самұрық-Қазына» АҚ-ның қаржылай қолдауымен, «Қазақстандық немістердің «Возрождение» бірлестігі» қоғамдық қорымен, ҚР Оқу-ағарту министрлігімен, Астана қаласының әкімдігімен және Германия Федералдық сыртқы істер министрлігімен бірлесіп жүргізілуде. Жаңа мектеп Қазақстанда ғана емес, Орталық Азияда да неміс білім беру стандарттары бойынша оқытатын алғашқы мектеп болмақ.

Оқу бағдарламасы түлектерге Қазақстанда да, Германияда да мойындалатын аттестат алуға мүмкіндік береді. Бұл оларға қосымша даярлық бағдарламасынан өтпей және қабылдау емтихандарын тапсырмай-ақ Германияның жоғары оқу орындарына түсуге жол ашады.

Сапар аясында Бернд Фабрициус ҚР Парламенті Сенатының депутаты Евгений Больгертпен және «Samruk-Kazyna Trust» қорының бас директоры Альфия Адиевамен бірге болашақ мектеп түлектеріне арналған жолдауы бар капсулаларды салтанатты түрде салу рәсіміне қатысты.

Жоба Қазақстандағы білім беру сапасын арттыруға және Қазақстан мен Германия арасындағы білім мен мәдениет саласындағы ынтымақтастықты нығайтуға ықпал етеді деп күтіледі.