Атырау мұнай өңдеу зауытын жаңғырту және отын сапасын жақсарту

Бұл Қазақстан Республикасының батыс өңірлерінің экологиясына автокөліктен шығатын газдардың теріс әсерін азайтуға мүмкіндік берді.

• 2003-2006 жылдары өткен жаңғыртудың бірінші кезеңі дизель отыны мен автобензиннің сапасын К-2 (Еуро-2) стандартына дейін жақсартты. Салынған және іске қосылған технологиялық қондырғылардың арқасында зауыт шығаратын дизель отыны құрамында күкірт мөлшері азайды. Дизель отыны К-2 (Еуро-2) стандартына сай болды, яғни күкірттің массалық мөлшері 500 мг/кг-нан (дизель отынының бір килограмына 500 миллиграмм күкірт) аспады. Жанған кезде отын құрамындағы күкірт қоршаған ортаға зиянды күкірт ангидридінің түзілуіне әкеледі. Атырау мұнай өңдеу зауытының отандық автокөлік жүргізушілеріне арнап К-2 дизель отынын өндіруі ауаға шығарылатын күкіртті ангидрид мөлшерін едәуір азайтты. Сонымен қатар зауыт өндірілетін автобензиннің моторлы сипаттамасын жақсартты.
• 2010-2016 жылдары жүргізілген жаңғыртудың екінші кезеңі автобензин сапасын К-4 (Еуро-4) экологиялық стандартына дейін жеткізді. Автобензин құрамындағы бензол мөлшерін төмендетуге мүмкіндік беретін қондырғылардың құрылысы аяқталды. Бензол (ароматикалық көмірсутек) – бұл канцерогенді зат. Жаңғыртудың екінші кезеңі қорытындысы бойынша зауыт К-4 маркалы экологиялық бензин шығара бастады, онда бензолдың мөлшері небәрі 1% болды. Басқаша айтқанда, К-4 (Аи-92, Аи-95) стандартындағы бензиннің әр килограмында 10 грамм бензол бар, бұл К-2 (Аи-80) стандартындағы отын мөлшеріне қарағанда 5 есе аз.
• 2011-2018 жылдары өткен жаңғыртудың үшінші кезеңі экологиялық автобензин мен дизель отыны өндірісінің көлемін ұлғайтуға, сондай-ақ К-5 (Еуро-5) экологиялық стандартын қамтамасыз етуге мүмкіндік берді. Егер К-4 үшін күкірт мөлшері 50 мг/кг болса, онда К-5 (Еуро-5) стандартындағы отын құрамында тек 10 мг/кг күкірт болатынын атап өткен жөн. Бір сөзбен айтқанда, К-5 (Еуро-5) стандартын игерген зауыт К-4 стандартымен салыстырғанда автобензин мен дизель отыны құрамындағы күкірт қосылыстарын бес есе азайтты! Сондай-ақ, К-5 класындағы бензинде (К-4 санатында да) ароматикалық көмірсутек (бензол) пен қоспалардың мөлшері шектеулі болады.

Қазіргі уақытта «Атырау мұнай өңдеу зауыты» ЖШС жаңғырту жобасының барлық үш кезеңінде 21 жаңа технологиялық қондырғыны салу және іске қосу арқылы еліміздің батыс өңірлерінің экологиялық жағдайын жақсартуға елеулі үлес қосып келеді.

Бүгінгі күні Атырау мұнай өңдеу зауытында өндірістік процестерге 32 технологиялық қондырғы жұмылдырылған.