Атырауда алып жобалар жүзеге асуда

2019 жылдың соңына қарай Атырау облысында Kazakhstan Petrochemical Industries интегрецияланған газ-химия кешенінің (ИГХК) құрылысы 53%-ға аяқталады. "Самұрық-Қазына" ҰӘҚ" АҚ Басқарма төрағасы Ахметжан Есімов интеграцияланған газ-химия кешенінің (I кезең - полипропилен өндірісі) құрылысымен танысып, "Ұлттық индустриялық мұнай-химия технопаркі" арнайы экономикалық аймағының аумағында орналасқан кешеннің құрылыс алаңдарын аралап көрді деп хабарлайды Қордың баспасөз қызметі.

Айта кеткен жөн, ҚР тұңғыш президенті – Елбасы Н.Назарбаев шамамен 10 жыл бұрын көмірсутек шикізатын терең өңдеу және полиэтилен шығару бойынша мұнай-химия өндірістерін құратын интеграцияланған газ-химия кешенін салуды жүзеге асыруды тапсырды. "Самұрық-Қазына" қоры басшылығының шешімімен 2018 жылдың маусым айында жоба "ҚазМұнайГаз" компаниясының сенімгерлік басқаруына берілді. Осы орайда 2019 жылдың соңына қарай жобаны іске асыру қарқыны 53%-ды құрайды деп болжануда. Салыстыра кетсек, жаңа менеджмент жобаға келгенге дейін бұл көрсеткіш 6% деңгейінде болған.

Нысанның құрылысы 2021 жылы аяқталады деп жоспарланып отыр. Жоба жылына 500 мың тонна полипропилен өндіруге мүмкіндік береді. Аталмыш жобаның құрылысы 2000-нан астам адамды жұмыс орындарымен қамтамасыз етуде.

Ахметжан Есімов соңғы құрылыс алаңына жасаған сапарынан бергі жобаны жүзеге асырудағы оң ілгерілеуді және жобаны жүзеге асырудың ел үшін маңыздылығын атап өтті. Жоба мұнай-химия саласын дамытудың тың бастамасы болмақ.

Жұмыс сапары барысында А.Есімов пропан/пропилен бөлуге арналған ірі көлемді сплиттер колоннасының құрылысын аяқтаудың салтанатты рәсіміне қатысты. Жабдықтар Қазақстанда "АтырауНефтеМаш" ЖШС мұнай және газ-химия салаларына арналған техника өндіретін зауытта өндірілген және бірегей және ең ірі құрал-жабдықтар болып табылады. Дайындалған колоннаның салмағы 1 100 тоннаны құрайды, ұзындығы 105 метр, диаметрі 8 метрден асады. Колонна жеті бөлек секциядан тұрады, бірақ толығымен жеткізіледі. Салыстырсақ, "Бәйтерек" монументінің биіктігі 97 метр.

Бағанды ИГХК құрылыс алаңына дейін Атырау-Доссор трассасының бойымен үш тәулік ішінде арнайы жүк көлігімен тасымалдау жүзеге асырылмақ. Бағдардың жалпы ұзындығы 45 шақырымды құрайды.

Сонымен қатар, Ахметжан Есімов қуаты 310 МВт газ турбиналы электр станциясын (ГТЭС) іске қосу рәсіміне қатысты. Жоба "Ұлттық индустриялық мұнай-химия технопаркі" арнайы экономикалық аймағы - полиэтилен және полипропилен өндіретін зауыттарда стратегиялық маңызды жобаларды электр энергиясымен және жоғары қысымды бумен қамтамасыз етуге бағытталған.