Азия даму банкі KEGOC жобасын қаржыландырды

«KEGOC» АҚ мен Азия Даму Банкі Қазақстан БЭЖ-і Оңтүстік аймағының электр желісін күшейту жөніндегі жобаны іске асыру үшін 58,2 млрд теңге сомасына қаржыландыру туралы келісімге қол қойды.

Бұл жоба электр энергиясын, оның ішінде жаңартылатын энергия көздерінен ірі ауқымда генерациялауды желіге интеграциялауға, елдің оңтүстігінде электр энергиясын жеткізуді күшейтуге және тұрақтандыруға, сондай-ақ Қазақстанның энергетикалық қауіпсіздігін арттыруға мүмкіндік береді.

«Самұрық-Қазына» АҚ-ның сатып алу қағидаларының конкурстық рәсімдеріне сәйкес таңдалған мердігерлер жобалау-сметалық құжаттаманы әзірлеу бойынша жұмыс жүргізіп жатыр. Кейіннен жалпы ұзындығы 475 км екі 500 кВ электр жеткізу желісін салуды, сондай-ақ 500 кВ «Шу», «Жамбыл» және «Шымкент» үш қосалқы станциясын реконструкциялауды және кеңейтуді көздейтін құрылыс-монтаждау жұмыстарын орындайды.

Осы кредиттік келісімді жасасу халықаралық қаржы институттарының «Самұрық-Қазына» АҚ тобының сатып алу рәсімдеріне, сондай-ақ халықаралық листингілік компанияларға сәйкес келетін KEGOC қызметіне деген сенімін растайды.