Балаларды ерте дамыту институты Қазпошта қызметкерлерімен онлайн конференция өткізді

Оқу-ағарту министрлігі «Балаларды ерте дамыту институты» РММ директоры Манара Адамова елімізде балалар мен аналарға мемлекет тарапынан көрсетілетін әлеуметтік көмекке кеңінен тоқталып, қатысушыларға баланы дамыту және оның психологиялық жағдайына баса мән беруге шақырды.

Сондай-ақ, педагогика ғылымдарының докторы, профессор, Қазақстан Республикасы оқу-ағарту министрлігінің «Балаларды ерте дамыту институты» РММ мектепке дейінгі тәрбие мен оқыту сапасын мониторингілеу және ғылыми-педагогикалық зерттеулер орталығының бас ғылыми қызметкері Сайра Жиенбаева қызметкерлерге бала тәрбиесі жөніндегі құнды кеңестерімен бөлісіп, оларды жеткіншектерді жастайынан еңбекке баулу қажеттілігі туралы айтты. 

Ал заманауи IT-технологиялар құзыреті орталығының басшысы, білім беру саласындағы жүйелік әдіскер Евгений  Щербатов Астанада бүлдіршіндерді балабақшаға орналастыруда қолданылатын «Indigo» қосымшасы жайлы әңгімелеп берді. Одан бөлек, іс-шара барысында республика бойынша балаларды балабақшаға орналастыратын осындай 12 қосымшаның бар екені белгілі болды. Сонымен бірге, конференция барысында ата-аналардың балаларды балабақшада орналастыру процесінде жиі жіберетін қателіктері туралы айтылды.

Қазпошта қызметкерлері аталған шарада жан-жақты ақпарат берілгендігін айтып, ұйымдастырушыларға алғыс білдірді.

«Ана ретінде осы Zoom-конферецияға қатысып, өзім үшін көп мағлұмат алдым. Әсіресе, балаларды балабақшаға орналастыру туралы көп ақпарат ұсынылды. Осындай іс-шараны өткізген ұйымдастырушыларға, бізге құнды мағлұматтар берген мамандарға рахмет», - деп атап өтті «Қазпошта» АҚ стратегиялық департаментінің бас менеджері Динара Смағұлова.