Бес күнде 13 майнинг-ферма анықталды

Мобильді топтар жүргізілген тексерулер нәтижесінде соңғы 5 күнде жалпы тұтыну қуаты 202 МВт болатын 13 майнинг-ферманы анықтап, олардың жұмысын тоқтатты, деп хабарлады энергетика министрлігінің баспасөз қызметі.

«Цифрлық майнинг бойынша қызметті жүзеге асыру фактісі: Қарағанды облысында жалпы қуаты – 31,3 МВт., Павлодар облысында – 22 МВт, Түркістан облысында – 3,28 МВт, Ақмола облысында – 1,03 МВт, Қостанай облысында – 0,82 МВт, Нұр-Сұлтанда – 1,8 МВт, Алматыда – 3,5 МВт, Шымкентте – 4 МВт» делінген хабарламада. 

Сондай-ақ, Батыс Қазақстан облысында жалпы қуаты – 91 МВт, Қарағанды облысында – 44 МВт болатын цифрлық майнингке өздігінен шектеу енгізілген.

Министрлік мәліметінше, майнинг фермаларын анықтау және электр желілерінен ажырату бойынша мобильді топтың жұмысы жалғасады. Мұнымен қатар, анықталған майнинг фермалары бойынша уәкілетті органдар жедел тергеу іс-шараларын жүргізеді.