Білікті маман Балсұлу

Мұнайлы мекеннің қалыптасуы мен қарыштап дамуына осындай еңбек адамдарының қосқан қомақты үлесі айтпаса да түсінікті жайт. Өйткені ширек ғасырға жуық табандылықпен, жанкештілікпен еңбек етіп, қайсар жандардың қолымен жасаған игілікті бүгінгі бақуатты ұрпақ ұлықтауы тиіс.

Балсұлу Еділбайқызы 1963 жылы 20-желтоқсанда Жетібай ауылында туған. «Жетібаймұнайгаз» ӨБ мұнай және газ өндіру цехында оператор болып еңбек жолын бастаған ол бүгінде тәлімі мен тәжірибесі толысқан, ауысым инженері қызметін абыроймен жалғастырып келеді.

«Ұжымдағы жұмысшылардың төккен тері мен адал еңбегінің арқасында межелеген жоспар орындалып, цех жұмысы алға жылжып отыр», – дейді Балсұлу Балмұханова.

1991 жылы Алматы политехникалық институтын тау кен инженері мамандығы бойынша тәмамдаған оның өз ісінің нағыз маманы екені көрініп-ақ тұр. Жұмыс барысында жаңа технологиялардың мүмкіндіктерін баяндай жөнелді.

«Цехта 402 ұңғыма бар. Соның 384 ұңғысы терең сорапты, тербелмелі, оның 18-і жер асты қысымының күшімен жасайды. Хонивел программасы арқылы барлық ақпараттар жүйеге автоматты түрде тіркеліп отырады. Және де қысым жоғарылаған кезде сораптарды өздігінен тоқтататын электрондық монометрлер орнатылып, топтық қондырғыларға массомерлер қойылды. Крон қондырғысының көмегімен спутниктік онлайн форматта ұңғылардың беріп тұрған өнімін, суын, газын есептеп көрсетуге мүмкіндік туды», – дейді білікті маман.