Білім мен тәжірибенің ұштасуы

Осы оқу жылында университет пен ҚБМ арасында ынтымақтастық туралы Меморандумға қол қойылып, оның аясында Шахмардан Есенов атындағы университет пен колледж студенттерін өндіріске аса қажетті, сұранысқа ие бес мамандық түрінен тәжірибеге бағытталған оқыту бойынша пилоттық жоба іске қосылды. Студенттер 5 ай бойы кен орнының цехтерінде теориялық білімін бекітіп, тәжірибе жинады. Компания басшылығы бітіруші түлектерді құттықтап, жылы лебізін білдірді.

«Компания мен университет арасындағы ынтымақтастық үлкен нәтиже беріп жатыр. Бүгін біз студенттердің өсіп-жетіліп, дайын маманға айналғанын көріп отырмыз. Оқытушылар мен түлектерді осынау маңызды күнмен құттықтаймыз! Үлкен өмірге аттаған қадамдарыңызға сәттілік тілейміз!», – деді персоналмен жұмыс және еңбекақы төлеу департаментінің директоры Ғибрат Ауғанов.

Қаражанбаста бес мамандық бойынша 10 студент тәжірибеден өтті. Оның ішінде 3 курстың 4 студенті оқуын жалғастырып жатыр. Қалған 6 түлек жоғары білім туралы диплом мен мұнай өндірісіндегі қазіргі жұмыс тәжірибесі жазылған еңбек кітапшасын, оған қоса ҚБМ басшыларының ұсыным хатын алды. Бұл болашақта жас мамандардың жұмысқа орналасуына көмектеседі.

«Бүгін біз үшін ерекше күн. Біз тек университеттен ғана емес, сонымен қатар, бізге баға жетпес тәжірибе берген Қаражанбастан да түлеп ұшамыз. Мен өз мамандығымның қыр-сырын толық меңгергендіктен, жұмысқа оңай кірісе аламын деп ойлаймын. Өйткені еліміздің жетекші мұнай өндіру компанияларының бірінде тәжірибеден өткенімді мақтан тұтамын», – деді Ш. Есенов атындағы университет түлегі Бүркіт Нұртасұлы.

Айта кету керек, Маңғыстау облысында мұнай өндіру компаниясы базасында тәжірибеден өту жобасы алғаш рет жүзеге асырылды. ҚБМ білікті жас мамандарды даярлауға жағдай жасап, келесі жылы тәжірибеден өтуші студенттер санын көбейтуді жоспарлап отыр.