«Бірлігі бекем ұжымның бір бөлшегі екеніме мақтанамын»

Ғасырлық тарихты бағындырған қарт Ембіде әр түрлі ұлт өкілдері еңбек етіп жатыр.

«Доссормұнайгаз» МГӨ басқармасының «Қарсақ» мұнай дайындау және айдау цехының шебері болып еңбек ететін Ренат Кузнецов жастайынан қазақы ортада тәрбиеленді. «Әкем – орыс, анам – қазақ, екі ұлттың да жақсы қасиеттерін бала кезден бойыма дарыттым» деген Ренат болашақ жарын да қазақ ұлтынан тапты.

Қазақ ұлтының асыл қасиеттерін бүгінде ұрпағының бойына сіңіруді көздеген Ренат шаңырағында балаларымен қазақ тілінде сөйлесіп, қазақы ұстанымды, жергілікті ұлттың ата дәстүрлерін жоғары бағалайды.

«Байшонаста туып-өстік. Ортам қазақы болды. Мұнайлы Мақат өңірінің төл перзенті болғандықтан, бала күнімнен мұнайшы болуды армандадым. Алдымен, Атырау политехникалық колледжінде оқыдым. Кейін Х.Досмұхамедов атындағы Атырау Университетіне түсіп, оны тәмамдаған соң, еңбек жолымды 2006 жылы «Доссормұнайгаз» МГӨ басқармасы «Ботақан» кен алаңында мұнай-газ өндіру цехының 3 разрядты операторы болып бастадым. Содан бері осы ұжымда табан аудармастан еңбек етіп келемін. Былтырдан бастап, аталған басқарманың «Қарсақ» мұнай дайындау және айдау цехында шебер болып еңбек етемін. Бірлігі бекем, үлкен ұжымның бір бөлшегі екеніме мақтанамын», – дейді Ренат Кузнецов.