Биыл Қазақстаннан Қытайға 8,3 млн тонна жүк жөнелтілді

Мәселен, елімізден биыл екі тоқсанда 8,3 млн тонна түрлі жүк жөнелтіліп, бұл көрсеткіш өткен жылдың есепті мерзіміне қарағанда 37% жоғары болған. Осы ретте, ерекше атап өтерлігі, Қытайға бағытталған астық 2021-2022 жылдардың өткен маусымдық егісіне қарағанда 4 есе өскен. Ал тартылған өнім тасымалы үш есеге жоғары болып және де бұл өнім түрі тек контейнерлерде жөнелтілген. Үрімші теміржолымен жүргізілген келіссөздердің нәтижелері бойынша Қытай тарапы тәулік сайын астықтасығыштарда бос тиелген бидайдың 1 құрамын және жабық вагондарда қапқа тиелген бидайдың 1 құрамын қабылдап алуға дайын екендерін жеткізген.  

Сонымен қатар шекаралас көрші елге бірқатар өзге де жүк түрлерінің тасымалы артқаны байқалады. Соның бірі, металл кенінің өсуін айтар едік. Оның ішінде, темір кенінің былтырмен салыстырғанда 25% артқаны белгілі болып отыр. Сондай-ақ, 220 мың тонна түсті металл және 75 мың тонна өсімдік майы экспортталған. Бұл жүктердің көрсеткіші өткен жылдың алғашқы айындағы жүк көлемінен 55 және 70 пайызға жоғары болып отыр.  

Ал Қытайдан Қазақстанға бағытталған жүк импортына келсек, оның көлемі ағымдағы жылдың алты айында 13%-ға, 5,4 млн тоннаға дейін өскен. Елімізге импортталған жеңіл автокөліктердің көрсеткіші өткен жылмен салыстырғанда 13%-ға, құрылыс жүгі 30%-ға, химиялық жүк 5%-ға артқан. Осылайша, екі ел арасындағы теміржол көлігімен тасымалданған жүк көлемі 13,7 млн тоннаны құрап, өткен жыл көрсеткішінен 26% артық болып отыр.