Бұрғышылар білім көкжиегін кеңейтті

Теориялық сабақтарда 35 жұмысшы ұңғымаларға бақылау жасап, құралдар түрімен танысып, күрделі жөндеу кезіндегі технологиялық бақылау тәртібін меңгеріп жатыр. Бұдан бөлек олар технологиялық процестерді есептеп, инженерлік ойлау дағдысын қалыптастыруды үйренеді.

«Супервайзинг не үшін керек?! Жыл сайын бюджетке қазу мен ұңғымаларды жөндеу жұмыстарына көп қаражат салынады. Бұл процесстерге бақылауды күшейтуіміз керек. Осы арқылы жұмыс сапасы артады. Сапа артқан жерде өндіріс көлемі көбейетіні белгілі», – деді қызмет жетекшісі Нұралы Гулджумаров.

Жетекші инженер Кенжебек Қазиев кен орнында 13 жылдан бері жұмыс істейді. Ұңғымаларды бұрғылау мен жерасты жөндеудің қыр-сырын жетік меңгерген Кенжебек коучтардан алған ақпарат арқылы білім көкжиегін кеңейтіп жатқанына қуанышты.

«Сабақ басталғаннан бері супервайзинг бойынша жақсы ақпараттар алдық. Дәріс ойдағыдай өтіп жатыр. Әзірге жаңа технология мен жаңадан шығып жатқан құрал-сайман түрлерімен танысып жатырмыз. Жұмысшылардың білімін жетілдіруге жағдай жасап жатқан Компания басшылығына алғысымыз шексіз», – дейді Кенжебек Қазиев.

Жұмысшылар теориялық материалдарды меңгеруден бөлек, бірқатар практикалық тапсырмалар орындайды. Сабақтар ашық диалог форматында өтіп жатыр. Оқытудың екінші кезеңі кен орнында өтеді деп жоспарланған. Оқу соңында дәріс берушілер талдау жасап, нормативтік-техникалық құжаттарды реттеуге көмектеседі. Алдағы уақытта Компания өз күшімен супервайзинг бойынша әлемдік стандарттарға сүйене отырып жұмысын жалғастырады.