Чемпионға көлік мінгізді

Сурет: "Өзенмұнайгаз" АҚ баспасөз қызметі

"Өзенмұнайгаз" АҚ бокстан әлем чемпионы Бекзат Нұрдәулетовке "Тойота Камри 70" маркалы темір тұлпарды салтанатты түрде табыстады. Салтанатты шараға қала әкімі Мақсат Ибағаров, "Өзенмұнайгаз" компаниясы бас директорының көлік және әлеуметтік сұрақтар жөніндегі орынбасары Айтқали Бәшенов қатысып, құттықтау сөз сөйледі.

"Қарсыласын қас-қабағымен жасытып, жеңіс туын биікте желбірететін Бекзат сияқты өжет, қайсар ұлдарымыз көп болсын!" - деді Айтқали Бәшенов.

Өзенмұнайгаздықтар ел мәртебесін көтеріп, абыройын асқақтатқан саңлақ спортшының 2020 жылы Жапония астанасы Токиода өтетін Олимпиада ойындарында топ жаруына тілектістік білдірді.

Еске сала кетсек, небары 21 жастағы Бекзат Нұрдәулетов Ресейдің Екатеринбург қаласында өткен дүниежүзілік біріншілікте 81 келі салмақта өнер көрсетіп, сенсациялық жеңістерге қол жеткізді. Мәселен ол жартылай финалда Кубаның даңқты боксшысы, бірнеше мәрте әлем чемпионы, Рио олимпиадасының бас жүлде иесі Хулио Цезар Ла Крузды есеңгіретіп, айқын басымдықпен жеңді. Ақтық сында өзбекстандық Дилшодбек Рузметовті тізе бүктірді.