Достық-Мойынты теліміндегі екінші жолдардың құрылысы 2025 жылы аяқталады

Дайын болған темір жолмен тағы да жаңа жолдарды одан әрі салу үшін топыраққа рельс шпал торшасын салатын жол төсеуші техникалар жүріп тұр.  

Екінші жолдың астына 6,6 млн текше метрге жуық жер төсемі төгілді. Жасанды имараттар да салынуда. Қазіргі таңда 67 көпір мен 225 су өткізгіш құбырлар салу бойынша жұмыстар жүргізілуде. Жоба шеңберінде барлығы 92 көпір тұрғызылып, 263 құбыр орнатылады. Автоматика және байланыс құралдарын қайта орнату жұмыстары да атқарылуда. Жоғары вольтты желілер үшін тірек бағаналар орнатылуда.  

«Бұл ірі жобаны жүзеге асыру қомақты қаражатты қажет етеді. Барлық құрылыс материалдары отандық өндірістен алынып жатқанын атап өту керек. Құрылыс процесіне қажет қиыршық тастармен қамтамасыз етіп отырған карьерлер қарқынды жұмыс істеуде. Карьерлерден жолға балласт ретінде төсеу үшін тәулігіне 4-4,5 мың текше метр қиыршық тас тиеліп, әкелуде», - дейді «ҚТЖ» ҰК» АҚ құрылыс жөніндегі басқарушы директор Марат Искалиев.

Нысан басында механизаторлар, көпір салушылар, байланысшылар, жолшыларды қосқанда барлығы 1 мыңнан астам жұмыс істеуде. Құрылысқа 450-ден аса түрлі арнайы техника тартылған.  

Телімдегі жұмыстарды 2025 жылы аяқтау жоспарланған. Жоба еліміздің транзиттік әлеуетін арттыру және үздіксіз экспортты қамтамасыз етуде зор мәнге ие. Екінші жолдар құрылысы іске қосылғаннан кейін Достық-Мойынты телімінің өткізгіштік қабілеті 5 есе өседі.