Екпені толық алған қызметкер екі күн демалыс алады

«Маңғыстаумұнайгаз» АҚ бас директорының орынбасары Жетібай Төлеғожаев бастаған топ «Жетібаймұнайгаз» ӨБ қызметкерлерімен жиын өткізді. Күн тәртібінде Компания қызметкерлері арасында КВИ таралуының алдын алу мәселесі қаралды.

Кездесулер сұрақ-жауап форматында өтті. Түсіндірме тобы тарап кеткен жалған ақпараттарды жоққа шығаратын және вакцинация процессінің жүру тәртібі мен одан күтілетін нәтижелерге қатысты тұшымды ақпарат берді. Мамандардың айтуы бойынша, қазір таралып жатқан вирустың қауіптілігі алғаш тараған вирустардан көбірек.

Сондықтан КВИ жұқтырудың алдын алу шараларына аса мән берген жөн. Мысалы, 25 мамыр күнгі ахуал бойынша облыс көлемінде ауырып, стационарға жүгінгендер саны 130-ға жуық. Олардың арасында пневмонияға ұшырағандары да аз емес. Ең қорқыныштысы – осы індетке шалдыққан балалар санының артуы. Қазір стационарда жатқан балалардың орташа жасы не бары 2,5 жас екен.

Компанияның өндірістік санитария және еңбек гигиенасы зертханасының жетекшісі компания тарапынан қызметкерлер қолайлылығы үшін жасалып жатқан шаралар туралы түсіндірді. Мәселен, қазір мұнайшылар үшін Ақтау қаласы мен Қаламқас кен орнынан 2 егу пункті ашылған. «ЖМГ» ӨБ қызметкерлері екпені Жетібай ауылдық ауруханасынан ала алады. Ал екпе алуға ниетті азаматтардың қатары көбейген жағдайда, өндіріс басынан да жылжымалы екпе пунктін ашуға мүмкіндік бар. Яғни, екпе алу үшін алысқа барудың қажеті жоқ.

Оған қоса, екпенің әрбір компонентінен кейін қызметкерлерге ынталандыру ретінде 1 ақылы демалыс күні берілетін болды. Яғни екпенің толық курсын алған адам 2 ақылы демалыс күнін ала алады. Демалысты алу тәртібі қызметкердің өз құзыретіне қалдырылған.