Елордада Халықаралық опера академиясы ашылады

«Астана Опера» театрының директоры Қазақстанның еңбек сіңірген қайраткері Ғалым Ахмедьяров Қазақстанның мәдениеті мен өнерін дамыту мақсатында вокалистерді оқытудың маңыздылығын атап өтті.

«Академия қатысушыларының практикалық қызметінің маңызды аспектісі – кең ауқымды сахналық тәжірибе. Жас әртістер театр спектакльдеріне қатысып, рөлдерді орындай алады, сондай-ақ оларға «Астана Опера» Камералық залы сахнасында түрлі концерттік бағдарламалар әзірлеу мүмкіндігі ұсынылады. Astana Opera Халықаралық опера академиясы – бұл жоғары білікті мамандардан білім ала отырып, жас опера әншілеріне шеберлік деңгейін арттыруға мүмкіндік беретін бағдарлама», – деді Ғалым Ахмедьяров.

Сонымен қатар спикер Вокал академиясының салтанатты ашылуы 4 шілде күні «Астана Опера» театрының Үлкен залында өтетінін атап айтты:

«Ғаламат концерт Академияның ашылуымен қатар, ең басты мерекелеріміздің бірі – Астана күніне орайластырылған, оған керемет шетелдік әртістер қатысады. Біз Марианджела Сицилия, маэстро Джузеппе Акуавива, Риккардо делла Шукка, Маттиа Росси (Италия), Либуше Санторисова (Чехия-Италия), Бадрал Чулуунбаатар (Моңғолия), Саян Исин (Қырғызстан) сияқты жұлдыздарды шақырдық. Сондай-ақ бағдарламаға біздің отандасымыз, қазір Германияның опера театрларында өнер көрсетіп жүрген Бауыржан Әндержанов те қатысады».

«Астана Опера» театрының ресми демеушісі – «Самұрық-Қазына» ҰӘҚ» АҚ.