Ембілік ардагер-мұнайшы «Құрмет» орденінің иегері атанды

Мұнайлы өңір - Байшонас кенішіндегі Қарсақ участогінің мұнай кеніші жабдықтарын жөндеу жөніндегі слесарь оқушысынан еңбек жолын бастаған Төлеген Байзақұлы кейін түрлі лауазымдарда қызмет ете жүріп, Прорва тобы кен орындарын игеруге, Теңіз кен орнының ашылуына, игеруге үлес қосты. Кәсіби маман ретінде өзін талай рет табысты еңбегімен көрсете білді.

Ел егемендігін алған тәуелсіздіктің алғашқы жылдарында еліміздің мұнай-газ секторының қалыптасуына белсене араласып, соның ішінде, «Ембімұнайгаз» АҚ жүйесіндегі бұрғышы-мұнайшылардан тұратын білікті кадрлар қатарының өсуіне, қалыптасуына күш-жігерін жұмсады.

Төлеген Байзақов еліміздің өндіріс саласындағы ұзақ жылғы үздіксіз табысты еңбегі үшін сан мәрте биік марапаттарға ие болды. Қазақстан Республикасы Президентінің Алғыс хатымен марапатталып, Қазақстан Республикасының еңбек сіңірген қайраткері және Атырау облысы Мақат ауданының Құрметті азаматы атағын иеленді.

Ембілік ардагер зейнеткерлік демалысқа шықса да, қоғамдық жұмыстардың бел ортасынан табылып жүр. Жақында мұнайшы-ардагеріміз тағы да жоғары марапатқа ие болды.