Ең маңыздысы еңбекақы ма?

Дегенмен, Әлеуметтік өзара ықпалдастық және коммуникация орталығы сарапшыларының жүргізген сауалнамасы нәтижесіне сай, жалақының басты орында емес екендігі анықталған. 

Өндіріс саласына жұмылған еңбеккерлер үшін маңыздысы қолайлы еңбек жағдайы мен ұжымдағы оң ахуал болып отыр екен. Бұл өндірістік кәсіпорындардағы сауалнамаға жауап бергендердің шамамен алғандағы үштен бір бөлігінің пікірі. Ал жалақы жағы жұмыс орнын таңдауда «Самұрық-Қазына» АҚ компанияларының өндірістік жұмысшылары үшін үшінші орында.

«Осы орайда күнделікті жұмыс пен одан тыс жеке тыныс-тіршіліктің теңгерімін қалыптастыра білу де жұмысшылар тарапынан ерекше бағаланады. Байқағанымыз, бұл мәселені әсіресе ауысымдық, яғни вахталық тәртіпте еңбек етуді таңдаған жұмысшылар тиімді деп санайды. Тереңірек сұрастырып едік, сұхбат барысында өндірістік жұмысшылар вахталық жұмыстың демалыс уақыты аралығында жеке бас шаруаларын шешіп алу мүмкіндігін беретінін атап көрсетті», - дейді Әлеуметтік өзара ықпалдастық және коммуникация орталығы талдау және консалтинг басқармасының жобалық менеджері Әйгерім Еркен.

Бұдан бірнеше жыл бұрын жұмысшылар арасында «Самұрық-Қазына» АҚ  қомпанияларына басқа жұмыс жоқтығынан орналасқандығын атап өткендер көп болса, қазір олардың пікірлері өзгерген. Мысалы, 2014 жылы, компанияларда жұмыс істеудің осы себебін көрсеткендердің үлесі 34% болса (нұсқалар ішінде бірінші орында), 2017 жылдың қорытындысында олардың салмағы 21%-ға дейін қысқарған.

«Соңғы кезде жұмысшылар арасында өз жұмысының артықшылықтарын тереңірек түсіну мен жауапкершілікпен қарау сарыны таралып келеді.  Осы ретте олар жұмыс беруші қамтамасыз етіп отырған еңбек жағдайын, бәсекеге қабілетті еңбекақыны, кәсіби және мансаптық өсім көкжиегін бағалауы жоғарылай түсті. Осындай оң өзгерістер екінші жағынан басшылықтың біздің және өзге де сауалнамалар арқылы жұмысшылар қауымы пікірін тыңдап, жалпы еңбек ахуалын жақсартуға күш салып жақандығының әсері деп айтуға болады», - дейді Әйгерім Еркен.  

Тағы біраз жұмысшылар компания мен мамандық таңдауда және жұмыс орнын іздестіру барысында әке мен баба жүріп өткен еңбек жолын басшылыққа алатыны белгілі болды. Әулеттік кәсіпті алға қойып жүргендер  теміржолшылар мен энергетиктердің арасында жиі тіркелген.