Еңбегі ерен «Ең үздік еңбек әулеті»

Мұратбай Жақсығатов 1961 жылы еңбек жолын «Маңғыстаумұнайгаз» тресінің, Жетібай барлау алаңында бұрғышының көмекшісі болып бастаған. Мұнай-газ өндіру бастығы, өндірістік-техникалық бөлім бастығы, кәсіподақ ұйымының хатшысы, басқарма бастығының орынбасары, «Жетібайнефть» МГӨБ партия ұйымының хатшысы, Өндірістік-техникалық және технологиялық қызмет бастығы секілді жауапты қызметті абыроймен атқарды. 43 жылдан аса өлкенің өндірісіне елеулі еңбек сіңіре жүріп, ұл-қыздарының да осы салаға бет бұруына сеп болды.

Үлкен бір әулеттің ақылшы тірегі, арқа сүйеріне айналған Мұратбай ағаның ұлдары Қуанғали, Аманғали, Сұлтанғали Жақсығатовтар бүгінде әке жолын жалғап, «Жетібаймұнайгаз» ӨБ еңбек етеді. Олардың әрқайсысының еңбек жылдарын бір санға біріктірсе, ғасыр айналары сөзсіз. Мұратбай ағадан тараған ұрпақтың өндірісте де, өмірде де өз орындарын тапқанына бүгінде ел куә. Қоғамдық шаралардан шет қалмай, үнемі алғы саптан табылатын әулеттің адал еңбегінен тапқан марапаты да мол, ұжым алдындағы абыройы да асқақ.

Төккен тердің, еткен еңбектің өтеуі сол – Мұратбай Жақсығатовтың «Құрмет», «Ерен Еңбегі үшін», «Еңбек ардагері» секілді атақ-абыройының арқасында Алашқа әйгілі атануы. «Ердің атын еңбек шығарады» деген осы емес пе?!

Қазақ мұнайының ардақтыларын тәрбиелеген қарашаңырақ – «Маңғыстаумұнайгаз» АҚ аға ұрпақ қалыптастырған еңбек дәстүріне қашанда адал болып қала береді.

Дереккөз: «Маңғыстаумұнайгаз» АҚ баспасөз қызметі