Еңбек – ырыс бұлағы: Қаражанбастықтар ардагерді зейнет демалысына шығарып салды

Әріптестері ардагерге ұзақ жылдар бойы Қаражанбас кен орнын дамытуға қосқан үлесі мен жас буынға тәжірибелі тәлімгер болғаны үшін алғыс білдіріп, жылы лебізін арнады. Сондай-ақ өмірдің маңызды кезеңі саналатын зейнет демалысына сәттілік тілеп, шапан жапты.

Қуанбек Орынбасаров саналы ғұмырының 35 жылын өлкедегі қара алтын өндірісіне арнаған жұмысшы. Ол алғашқы вахта ауысымына көлік басқармасының машинисі болып аттанды. Кейін №2 мұнай өндіру цехында құбыр жүргізуші, шебер қызметтерін атқарған. Ардагер соңғы 28 жыл көлемінде ҚҚҰЦ басшының орынбасары болып, абыройлы еңбек етті.

«Туған өлкені дамытып, оған қызмет ету – әр азаматтың парызы. Мен де өмір кітабымның алтын тарауын Қаражанбаста өткергеніме ризамын. Кен орнымызды көркейтіп, әрі қарай дамытатын жас мамандарға сенемін», – деді ардагер.

Кәсібилік, табандылық пен қарапайымдылық. Адамдық пен мамандық биігінде әр ісіне жауапкершілікпен қараған Қуанбек аға соңғы вахта ауысымын қимастықпен аяқтады. Енді оны еңбегінің жемісін көріп, ұл-қыздарынан тараған ұрпақтың қызығына бөленетін өмірдің ең шуақты кезеңі күтіп тұр.