Еңбекті қорғау үздіктері марапатталды

Өндірісте өмір және еңбек қауіпсіздігін сақтау – «Қаражанбасмұнай» АҚ-ның күн тәртібіндегі ең маңызды мәселе. Бүкіләлемдік еңбекті қорғау күніне орай аталмыш салада мұнайшылардың қауіпсіз жұмыс істеуіне елеулі үлес қосып жүрген бірқатар қызметкер «ҚазМұнайГаз» ҰҚ» АҚ Басқарма төрағасының Құрмет грамотасы және ҚБМ Басқармасының алғыс хатына ие болды.

Кен орнында өткен «Сақтансаң сақ боларсың» атты шарада өндірістік басқарма директоры Кәрім Бозахаров еңбек қауіпсіздігін сақтау бойынша кешенді шаралар жоспарының орындалуы туралы айтты. Сондай-ақ компанияның қазіргі жағдайы баяндалып, соңғы мәлімттер таныстырылды.

Бұдан соң салтанатты марапаттау рәсімінде Қауіпсіздік және еңбекті қорғау бөлімінің басшысы Наурызбек Дүйсекеновке мұнай-газ саласының дамуы жолындағы қажырлы еңбегі үшін ҚМГ-ның Құрмет грамотасы табысталды. Оған қоса әр түрлі цехтар мен бөлімдердің бес қызметкері қауіпсіздікті сақтау шараларына белсенді қатысып, жазатайым оқиғаларды болдырмауға үлес қосқаны үшін ҚБМ Басқармасының алғыс хатымен марапатталды.

Сондай ақ, бес жыл көлемінде жазатайым оқиға мүлдем тіркелмеген бірқатар цех басшысына арнайы ынталандыру сыйлықтары берілді. Жұмысшылардың денсаулығын сақтау мен қауіпсіздігін нығатуға бағытталған жұмыстар алдағы уақытта да жалғасын табады.