Германияда Еуро-2024 кезінде қалааралық пойыздармен 12 миллион жолаушы тасымалданды

Жанкүйерлер үшін барлығы 260 мың арнайы билет сатылған. Еуро-2024 ұлттық серіктесі Германия темір жолдары (DB) чемпионат кезеңінде күн сайын жүретін 14 қосымша пойызды енгізді. Бұл жолаушыларға тағы 10 мың орын ұсынуға мүмкіндік берді.

Турнир барысында пойыздарда да, станцияларда да бірде-бір ауыр оқиға тіркелмеген. 5400 DB қауіпсіздік қызметкері тәртіптің сақталуын қамтамасыз етті.  

Турнирге қатысқан кейбір футбол командалары Германия қалалары арасында ICE пойыздарымен жүрді. Румыния құрамасы басқаларға қарағанда теміржол көлігін 6 есе көп пайдаланған.

Халықты ойын алаңдары мен жанкүйерлер аймақтарында тасымалдау сонымен қатар аймақтық пойыздармен, DB автобустарымен және S-Bahn (қалалық рельс) жылжымалы құрамымен жүзеге асырылды. Бір ғана Берлинде матч күндері 750 мыңға жуық жолаушы S-Bahn пойыздарымен стадион мен жанкүйерлер аймағына жеткізілген. Мюнхенде DB автобустары чемпионат басталғалы 110 мыңға жуық жанкүйерді стадионға және кері тасымалдады. Аймақтық жолаушылар көлігі операторы DB Regio пойыздарында күн сайын 3,5 миллионнан астам адам қатынаған.  

Чемпионат қонақтарына 25% жеңілдік берген Interrail жол жүру билеттерін 7600 жанкүйер пайдаланды.