Жабдықтарды жөндеу – жауапты іс

Жабдықтарды пайдалану және икемдеп жөндеу цехы білікті мамандар мен сапалы жұмыс үйлесім тапқан маңызды цехтардың бірі. Ол дәнекерлеу-монтаждау және жөндеу учаскелерінен тұрады. Мұнда темірден түйін түйген дәнекерлеушілер, білікті слесарь-жөндеушілер, қабілетті құрастырушылар мен тәжірибелі токарьлар, екі вахта ауысымында барлығы 250-ге жуық жұмысшы еңбек етеді. Мамандар түрлі цехтардан түскен тапсырыстар бойынша жабдықтарды құрастырып, жөндеп, дәнекерлеумен айналысады.

Александр Костюк аталмыш цехта 20 жылдан астам уақыттан дәнекерлеуші болып жұмыс істейді. Ол осы уақыт ішінде мыңдаған металды біріктіріп, білімі мен тәжірибесін шыңдаған. Алтыншы дәрежелі дәнекерлеуші Қаражанбаста ұйымдастырылатын «Үздік маман» сайысының алғашқы жеңімпаздарының бірі. Жұмысшы мықтылығын аймақтық байқауларда да дәлелдеп, үздіктер қатарынан көрінген. Александр бүгінде жас буынға ағалық ақылын айтып, дәнекерлеудің қыр-сырын меңгертіп келеді.

«Біз арнайы алаңда да, ашық аспан астында да дәнекерлеу жұмыстарымен айналысамыз. Қолайсыз күн райын елемей, уақытпен санаспай еңбек ету арқасында, жұмыстың үздіксіз жүруіне үлесімізді қосып келеміз. Қызметім өзіме ұнайды. Жұмысымыз қырағылық пен ептілікті талап етеді. Оған қоса қауіпсіздік техникасын сақтау аса маңызды», – дейді Александр.

Токарьлар күн сайын жұмыс ғимаратында қажетті жабдықтарды жонумен айналысса, 24 дәнекерлеу агрегаты кен орнының түрлі аумақтарында жұмыс істейді. Бұдан бөлек цех жұмысшыларының көбі мұнай тасымалдауға арналған шыны талшықтарды құрастыру мен жалғауға жұмылдырылған. ЖПжИЖЦ-ның жалпы жұмыс өнімділігі – цехтардан келіп түскен тапсырысқа тікелей байланысты.

«Цех мамандарының кәсібилігі арқасында жүктелген міндеттерді абыроймен атқарып келеміз. Жұмысшылар өз істерімен еркін айналысу үшін барлық қажетті құрылғылармен қамтамасыз етілген. Былтыр цех аумағындағы жұмысшылардың санитарлық бөлмесі жөндеуден өткізілді. Еңбек жағдайлары жақсарған сайын жұмыс өнімділігі мен нәтиже де жақсара түседі», – дейді дәнекерлеу-монтаждау учаскесінің басшысы Берді Өтебай.

Цех ұжымының мақсаты берік, бағыты айқын. Ал дәнекерлеушілер мен слесарь-жөндеушілер өндіріс алаңдарында құстай ұшып, қарлығаш көмегін көрсетуге қашан да дайын. Өзара ынтымақтастық пен нәтижеге талпыну - Қаражанбастың қарыштап дамуының кілті.