«Жайлы мектеп» жобасы бойынша 118 нысанның мердігері анықталды

Байқауға барлығы 202 компания қатысып, ұзын-cаны 781 өтінім берді. Биыл 185 мектептің құрылысын бастау жоспарланған, сәйкесінше осынша лот жарияланды. 118 нысан бойынша мердігерлер бірден анықталса, 52 лот бойынша сатып алу өткізілмеді, өйткені қатысушылар біліктілік талаптарына сай келмеген. Тағы 15 лот жойылды.

Мысалы, Солтүстік Қазақстан облысында 1 мектептің құрылысына конкурс жарияланды, алайда мердігерді анықтау мүмкін болмады. Алматы облысында жарияланған 24 лоттың 7-уі бойынша жеңімпаз анықталса, қалған 17 мектеп бойынша мердігер анықталмады.

Конкурс нәтижелерімен «Самұрық-Қазына» ҰӘҚ сатып алу бойынша онлайн-платформасында танысуға болады (skcn.qaz.network).

Айта кетейік, қазіргі конкурстардың жалпы қорытындысы жарияланғаннан кейін жеңімпаз анықталмаған лоттар бойынша сатып алу рәсімдері қайта өткізіледі.

Жеңімпаздар ұлттық жоба операторы Samruk-Kazyna Construction компаниясымен ЕРС-шартқа қол қояды. Осылайша, мердігер компания мектепті жобалау (Engineering), жабдықтарды сатып алу (Procurement) және құрылыс (Construction)  жұмыстарын біріктіреді.

ЕРС-шарттарға қол қойылғаннан кейін мектептерді жобалау басталады. Жобалаумен қатар мектеп құрылысы жоспарланған жер учаскелерінде аумақты тазалау, уақытша инженерлік желілерді тарту, қоршау орнату сияқты дайындық жұмыстары басталады.

Нысандар дайын күйде тапсырылады, яғни құрылысты да, жарақтандыруды да конкурста жеңіске жеткен компания жүргізетін болады. Яғни, жиһаз, сантехника, интерактивті жабдықтар үшін жеке-жеке лоттар болмайды. Конкурсқа қатысушыларға нысандарды салу және жарақтандыру жөніндегі жұмыстарды орындау мақсатында материалдық, еңбек және қаржы ресурстарын шоғырландыру үшін консорциумдарға бірігуге мүмкіндік берілді.