Жетібайда бір тәулікте 7 мың тонна мұнай өндірілді

Жетібай кен орнының мұнайшылары 41 жылдан кейін, соңғы рет 1981 жылы қол жеткен тәуліктік мұнай өндіру көрсеткішін қайталап, көптен бері бағынбай жүрген 7000 тонналық белесті бағындырды. Бұл Компания және өлке мұнайгаз саласы үшін тарихи маңызы бар оқиға.

Тарихи меже 1-шілде күні қанжығаға байланған. Содан бері майталман мұнайшыларымыз көрсеткішті одан әрі көтеруге жұмыстанып келді. Шілденің 13 күнгі тәуліктік мұнай өндіру көлемі 7102 тоннаны құрап, кенорын әлеуетіне деген сенімімізді арттырды.

Өлке мұнайгаз саласының шежіресі дәл осы Жетібай кенорнынан бастау алған болатын. Былтыр маңғыстау мұнайының қара шаңырағына 60 жыл толды. 1961 жылы 5 шілдеде №6 ұңғымадан алғашқы мұнай фонтаны атты. Бүгінгі тарихи оқиғаның сол бір айтулы датамен сәйкес келуі де тегін емес болар. Жетібай кенорнының екінші тынысы ашылғандай. Содан бері Жетібай кенорны өлке мұнайгаз саласының қайнар көзіне айналды.