Жылыой мұнайшысы "Асыл домбыраға" ие болды

Мега жобада әр облыстың құрама командалары жыр бәйгесінде бақ сынасты. Сөз барымтасында жыр сүйер қауымның ыстық ықыласына бөленген Атырау облысының ақындары 17 облыс, 3 республикалық қала, барлығы 20 топтың ішінен топ жарып, жүлделі 1-орынды иеленді. Сайыстың Бас жүлдесіне ие болғандар – жамбылдық ақындар.

Атырау облысының құрамасында біздің әріптесіміз, «Жылыоймұнайгаз» мұнай-газ өндіру басқармасының қызметкері Сырымбек Сәрсембаев шебер өнер көрсетіп, «Асыл домбыра» иесі атанды.

Сырымбек Сәрсембаевтың республикалық ақындар айтысында шебер өнер көрсеткенінің айғағы – Асыл домбыра Атырау облыстық өлкетану мұражайының төрінен орын алып, мұндағы құнды жәдігерлердің қатарын толықтырды.